  |
  
|
尋晚終於再笑笑口同番佢地講嘢...因為我唔想再講其他大話呃好朋友話自己唔開心o既原因...
講大話好辛苦...當然我唔係未講過大話..但我唔想連自己都呃自己...
既然決定放棄...就應該去積極面對...
當然你問我見到佢地眉到眼去有冇嘢...我話冇..你都唔信啦...
我個心仲好up....up得有d痛tim...但都冇法...要keep住秘密就要捱落去...
大家做好朋友..起碼可以keep得耐d....其實愛情可以係一個人o既事....
而且我自己根本接受唔到同好朋友鐘意同一個人....以前我都曾經摸過佢塊面...因為我問過佢塊面係咪真...因為佢塊面以前成日都受傷(哈哈...其實乘機就真)...不過以後都唔可以再摸佢塊面lu...
未說出我心中故事
誰料到你我他也在夢兒
像說出情話不智
無奈太怕離別
原諒我不願來道別
原諒我不願明示
原諒愛的心不知怎示意
我願待過些時
三角終一邊痛悲
太壞有一邊逃避
得有一邊懂時機
放下愛同情妒忌
心裡想找到轉機
我恨我有點迴避
三角將一邊提起
最後由兩面結尾
點解??點解到最尾o個個係我好朋友...當好朋友同我講佢同小男生o既嘢o個陣...(其實早一晚已有心理準備...所以係返學之前買左少少酒壯膽...我真係驚頂唔順)
我個心真係好痛...好朋友而家算叫做做人地第三者..
佢仲好似好理直氣壯咁....
聽到一半,繼續上堂...但上上吓...真係頂唔順..走左去廁所喊...
我一直都不停後退,就係唔想去到好朋友個地步....
同好朋友一直搭車,一路聽佢同小男生O既嘢....
我覺得好似局外人咁...我算係D咩?
我同時發覺小男生對我O既態度變晒....唉~~
希望佢D態度繼續差D...唔好對我咁好...因為對我好我會唔開心...
但佢依然關心我....
其實我咪仲心痛....
雖然我都知上堂前飲酒係唔arm...但我係上到堂同抄到notes咖...尋日仲笑緊我...
但佢今日竟然對我有責怪o既意思...
個個都可以話我..但佢唔得....
因為佢....我先至咁唔開心....
我個心仲唔舒服....真係好唔舒服...好似比人兜心口打一下o既感覺...
本來曾經諗過同好朋友講我對小男生有好感...但我知講左就會傷害左大家...與其傷害兩個朋友,不如我自己一個唔開心就好喇...
其實衝去廁所喊o個陣, 我打左比一個朋友....係...又係上次一打去就嚎啕大哭o個個朋友...我猛講我一定喊晒佢...唔係朋友會懷疑...佢地會唔開心...係人地面前,我可以呃到一吓人,但當我自己一個o個陣,我係唔可以連自己都呃埋...所以我要打比我另外一個好朋友傾...如果唔係,我會癲...
尋晚仲同好朋友講...只要佢開心...我會支持佢....
我開始發覺我真係傻....支持情敵?!
我係咪好傻?好on居?
其實要我真心講呢句說話係要好大勇氣....但都講左出嚟...
我諗我係o個種幾咀gel gel o個種人...不過都唔係o個種口出傷人o個種....大家都知我只係貪玩...
arm arm開左學...d義工活動都仲係未做晒...所以都係好忙...
返到學校...未上堂就會同d同學仔傾計狂玩.....
好耐冇見過男同學A...
我同另一個同學都異口同聲話:你肥左呀....
同學A: 咩呀?我練緊喇...
我:練咩呀你...練大左個胃口呀?
同學A:咩呀...唔信你摸吓...
另一個同學摸完之後:嘩....你個肚泡o既...
我o個陣擺左一副miu咀miu舌o既樣....(即係衰衰格格o既樣)
男同學A突然捉住我隻手摸佢個肚...我冷不提防(被迫)摸...
男同學A: 摸到未呢?
我:真係摸到呀...
男同學A:都話有練咖啦...摸到呢....
我:我摸到呀...仲覺得郁tim ar...你有左幾多個月呀?你bb肚餓喇...快d餵佢啦...
男同學A向我做出想打死我O既表情....
hehe....激屎人成功...
-------------------------------------------------------------------------------------------
放左學...大家一齊行出去搭車...
咁arm有一架私家車走出嚟讓我地一班人先行...
男同學B:咁好O既...?咁禮讓o既...?
我:咁你快d走出馬路中間鞠個躬比佢啦...
男同學B:咁你唔出?
我:我冇讚佢wor...
我諗佢會想殺死我
...哈哈哈哈...
哈哈~~不過我只會咁樣整古d男同學...女同學真係唔敢呀...佢地面皮薄嘛...真係會嬲咖...所以我會鐘意同男同學傾計多d...起碼唔洗轉個彎講嘢嘛...我自己講嘢都唔鐘意轉彎...好辛苦咖...
祝大家中秋節快樂...過左一個好忙o既九月...又回復返平日o既我...
繼續返工兼返學....
上星期日,去左老人院做義工...我同另一個義工負責一part,不過我地全部都要戴口罩...
有一個呀婆係咁拉住我同我傾計...
「你結左婚未呀?」婆婆問...
「......(第一嘢就咁問我).....未呀....婆婆」
「你個相生得好好咖其實....」
我鬼鬼馬馬講....:戴左口罩你都知?
「呀婆識得睇咖...以前我幫人睇相咖...有時人地比錢我收,我都唔睇咖...你應該第時幾好咖..不過要遲婚囉...」
我再次鬼鬼馬馬講:呀婆,咁我係咪即係嫁得出呀?
「你記住遲婚呀....唔係,成日拗交咖喇...」
我聽到呢度...忍唔住企係度大笑....我唔係因為嫁得出而笑...而係覺得好好笑...唔知點解...
我個partner離遠見到我傻笑,佢覺得我好詭異wor...仲話點解呀婆唔幫佢睇相...
其實我一直以嚟,我都好想係一d大時大節去老人院派吓禮物,玩吓遊戲...願望成真..我好開心就真...其實佢地都好寂寞咖...
我越嚟越發覺我都欣賞男人著西裝o個個樣...唔計我鐘意o個個人...因為如果我鐘意就著咩都咁好睇...我係講緊一個街外唔識o既男人...
著西裝男人感覺好似好pro咁...而且要係高瘦先著得好睇...唔係話歧視d肥人...但係我又覺得唔係咁有型囉...尤其係你見到佢地著到d恤衫爆晒咁...就唔係good fit la...
一個有型o既男人著西裝除左good fit之外,仲要係著尖頭o既皮鞋...刷得立立令咁...就真係掂喇...我反而唔鐘意o個d太大隻o個d...好似想隨時揼你兩嘢咁...當然有d肌肉係好啦...
不過我只係鐘意睇咖姐...我呢d眼看手勿動o既....哈哈哈哈~~你叫去識...wor.~~你估我傻咖咩...我諗除左做義工要social之外,我諗我唔會自動識男仔喇~~我呢d淨講唔會做o既...
呢個九月好忙呢...
呢個星期日就要出去一個嘉年華做義工...
下星期六開始又要上義工課程,連續上n咁多個鐘o個種...13號同d義工朋友食晚飯...
19/9就要開最後一次籌備會議...因為要27/9要去老人院做探訪,為他們作中秋節活動...
我同另一個義工準備一個遊戲同d老人家玩呢~~希望到時唔好比d老人家玩番轉頭啦~~哈哈...
26/9又係上o個個義工課程....一定要上晒咁多個鐘先可以拎證書...
and then 九月尾就開學lu~
開左學之後又要少d做義工...唔係d成績好難keep咖喇~~
因為我想繼續讀上去...起碼讀埋個學士學位吧~~
我要奸巴爹~~!!
yeah~~
熨返工衫其實一d唔難到我...不過只係熨屋企人o個d...自己o個d好少熨..大概是我懶熨吧~~
而家已經好少熨屋企人o既衫..因為放左工已經攰到隻狗咁...仲邊會熨衫...而家全部都係呀媽熨...
尋晚見呀媽個樣好攰,所以都幫一次手...
一口氣熨晒咁多日(其實幫呀哥熨)要著o既...幫呀哥將d衫擺番入衣櫃o個陣,見到有一大塊「梅菜」係櫃入面瑟縮一角...仲隱約有一陣邪味飄出嚟...
我大聲叫:呀哥,你件衫係咪今日著過?
呀哥:係呀...
我:你著過做咩隊番入櫃...臭咖wor...
呀哥:咁冇人熨ma....
我:呀~~~~~~~~~~~~~~~~
呀哥:你個樣好似中左「毒」咁wor...
我:好彩我長期鼻敏感姐...塞左一邊鼻咋...如果兩邊鼻通晒,我暈係你間房都似...
呀哥:@#%@*&^@$%@
我:哈哈~~
